समाचार स्वास्थ्य हिंसा

विराटनगरका निजी अस्पतालले फनफनी घुमाए, धरान पुग्दा मृत्यु भयो

ज्वरो देखिएको भन्दै विराटनगरका एकसेएक निजी अस्पतालले भर्ना लिन नमानेर फनफनी घुमाएका एक विरामीको धरानमा उपचारका क्रममा निधन भएको छ ।

देवानगञ्ज-१, सुनसरीका ३५ वर्षीय रवीन्द्र यादवको मृगौला र लिभरमा समस्या देखिएपछि कोशी अस्पतालले भेन्टिलेटर भएको अस्पतालमा लैजान रिफर गरेको थियो ।

विरामीका परिवारले बुधबार राति र बिहीबार विहानभर विराटनगरका एकपछि अर्को निजी अस्पतालमा पुर्‍याएका थिए । तर ज्वरो आएको भन्दै गेटबाट प्रवेश नै दिएनन् । बिहीबार मध्याहृन धरानस्थित वीपी कोइराला स्वास्थ्य विज्ञान प्रतिष्ठान पुर्‍याइएका उनले केही घण्टामै निधन भएको छ । राति करिब ७ बजेतिर उनको निधन भएको बुवा जोगिलाल यादवले जानकारी दिए ।

हार्बिसाइड (खेतमा प्रयोग हुने किटनाशक औषधि) सेवन गरेका रवीन्द्र यादवलाई परिवारका सदस्यहरुले आइतबार नै कोशी अस्पतालमा भर्ना गरेका थिए । तर उनको स्वास्थ्यमा सुधार भएन ।

मृगौला र कलेजोमा समस्या देखिएपछि भेन्टिलेटरमा राख्नुपर्ने भयो । तर कोशी अस्पतालमा भेन्टिलेटर छैन । त्यसैले अस्पतालले बुधबार साँझ भेन्टिलेटर भएको अर्को अस्पतालमा लैजान रिफर गर्‍यो ।

आफन्तले एम्बुलेन्समा राखेर बिराटनगरकै नोबेल मेडिकल कलेज लगे । तर, ज्वरो देखिएको भन्दै बिरामीलाई गेटबाटै फर्काइदियो । त्यसपछि उनीहरू लाइफगार्ड अस्पताल पुगे । त्यहाँबाट पनि उपचार नगरी उनीहरूलाई फर्काइयो । एकातिर रवीन्द्रको अवस्था नाजुक बन्दै थियो भने अर्कोतिर कुनैपनि अस्पतालले उनीहरूको भर्ना लिन मानेको थिएन । त्यसैले भाइ रामलालले मध्यरातमा बिरामी दाइ रवीन्द्रलाई घरमै फिर्ता लगे ।

पछि पैसा जोहो गरेर बिहानै घरबाट रामलालले नै दाइलाई लिएर हिँडे । बिरामीको ज्वरो भने घटेको थिएन । उनले नोबेल अस्पतालमा फोन गरे । तर, अस्पतालले कोभिड अस्पताल लैजान सुझाव दियो । रामलाल बिरामी दाइलाई लिएर न्यूरो अस्पताल पुगे । त्यसपछि रवीन्द्रलाई गि्रनक्रस अस्पताल लगियो, त्यहाँबाट गोल्डेन अस्पताल ल्याइयो । तर, सबैले ज्वरो नापे र गेटबाटै फर्काए ।

अन्यत्र लैजाने अवस्था थिएन । त्यसैले रामलालले रवीन्द्रलाई लिएर ९ बजे कोशी अस्पतालमा पुगे ।

उनको अवस्था झन् बिगि्रसकेको थियो । मुखबाट रगत आउन थालेको थियो । सास फेर्न गाह्रो भएको थियो । त्यसैले तत्काल भेन्टिलेटर भएको स्थानमा लगेर डाइलसिस गर्न सुझाएको कोशी अस्पतालका चिकित्सक लक्ष्मीनारायण यादवले बताए । तर विराटनगरको कुनै अस्पतालले उनलाई भर्ना लिन मानेन । त्यसैले दिउँसो १२ बजेतिर एम्बुलेन्स खोजेर परिवारले धरान लगेको थियो ।

जवाफ लेख्नुहोस्

तपाईंको ईमेल ठेगाना प्रकाशित हुने छैन । आवश्यक ठाउँमा * चिन्ह लगाइएको छ